4 de decembre a Masamet

Aquesta rescontra anuala dels regents e animators de totes los establiments Calandreta foguèt una jornada rica d’escambis.

Los renduts dels talhièrs seràn publicats sul siti tre validacion, dins l’espèra, un extrach de la plenièra del matin, un tèxte de Patrici Baccou, director d’APRENE :

” enfin, voldriái acabar amb dos imatges tirats de la presentacion de Perpinhan per illustrar lo tèxte trabalhat amb Pèire Joan Laffitte qu’escriguèron los Paissèls Ajudaires per paréisser a Barcelona dins un obratge collectiu : «Fem l’Escòla Plurilingue»

… «  Edgar Morin, en antropològ, insistís sul fach que tota pensada e tota practica son integradas dins lor environament — « eco-integradas », çò ditz lo pensaire —, e que tot environament uman digne d‘aqueste nom es complèxe.

Pensar lo mestièr d‘ensenhaire coma la gestion a basa de ” motivacion ” d‘una jornada immutablament facha d‘una seguida de sesilhas o sequéncias didacticas, caduna fòrça elaborada dins son prat cairat, aquò‘s renonciar a tota complexitat.

Aital la classa sembla una plantolièra, un alinhament ortonormat de pòts onte cada planta creis dins son pròpri isolament.

Al contrari, la complexitat umana reala de tot grop sembla mai a una prada : i reconeissèm aital una vertadièra riquesa ecologica.

La classa cooperativa es pas una plantolièra, es una prada.
Amb tota la complexitat, e donc lo besonh d‘organizar seriosament aquesta complexitat, de la saber aculhir coma tala sens per aitant que l‘anarquia s‘installe.

Cresi qu’es aquesta complexitat que devèm assumir, amb de grops de paraulas, de lecturas de monografias, d’estagis de formacion contunha, per traçar, comprener, desbartassar son caminament pedagogic, cadun e totes.

Cresi que nos cal èsser dobèrts, a l’escota e se sasir de la noveltats e de las innovacions.

Mas cal far mèfi : soi convençut sincerament que la disciplina positiva, los espacis dins la classa, los messatges clars, las matematicas euristicas, lo metòde de Singapor, la postura benvolenta, la comunicacion non-violenta, e ne doblidi segurament, son d’aisinas plan interessantas.

Atencion pasmens : apareisson sovent coma de recetas miracles.

Ne son pas.
Res remplaçarà pas un acarament caput, prigond, vertadièr, a la complexitat de la classa immersiva cooperativa, e al sens de la nòstra plaça d’adulte responsable dins la classa e dins l’escòla. Demanda de modestia e de conviccion, e de s’i téner, de longa.

Es çò que Renat apelava : « lo de qué fotèm aicí ?» Mai que las mòdas passadissas, demòra mai que jamai d’actualitat.